Kriştianu Ronaldu: "İstədiyim vaxt danışıram, gülləkeçirməzəm"

"İstədiyim vaxt danışıram, gülləkeçirməzəm".

"Report"un məlumatına görə, bunu Portuqaliya millisinin və İngiltərənin "Mançester Yunayted" komandasının futbolçusu Kriştianu Ronaldu özü ilə bağlı tənqidlərə cavab verərkən deyib.

37 yaşlı hücumçu mətbuatı yalan informasiya yaymaqda ittiham edib: "Zaman hər zaman vacibdir. Başqalarının nə düşünməsindən narahat olmadan gah doğru, gah da yalan yazırsınız. Kim olduğumu, nəyə inandığımı hamı bilir".

Təcrübəli forvard böyük potensiala sahib olduqlarını bildirib: "Əvvəlcə Qana yığması ilə oyun haqqında düşünüb, sakitcə hərəkət etməliyik. Bu matçla böyüyəcəyik. Ən yaxşı komanda çempion olacaq. Favoritlər Braziliya, Argentina, Fransa, İspaniya və Almaniya hesab olunur. Amma 2016-cı ildə Avropa çempionu olanda gördük ki, daha yaxşısını edə bilərik".

O, rekord dalınca qaçmadığını əlavə edib: "Özləri məni tapır. Heç nəyə ehtiyacım yoxdur, hər şeyim var. Amma dünya kubokunu qazanmaq möhtəşəm olardı".

Qeyd edək ki, Portuqaliya millisi H qrupunda Qana, Uruqvay və Cənubi Koreya ilə mübarizə aparacaq.