Alban-Udi xristian dini icması üzvləri Hadrutdakı "Müqəddəs Məryəm ana" kilsəsini ziyarət ediblər

Qafqazdakı Alban Həvarilər Müstəqil Kilsəsinin varisi olan Alban-Udi xristian dini icması erməni işğalından azad edilən Xocavənd rayonunun Hadrut qəsəbəsindəki "Müqəddəs Məryəm ana" kilsəsini ziyarət ediblər.

"Report"un Xocavənd rayonuna ezam olunmuş əməkdaşı xəbər verir ki, icma nümayəndələri məbəddə dini ayinlər icra edib və şamlar yandırıblar.

Qeyd edək ki, tədbir Dini Qurumlarla İş üzrə Dövlət Komitəsinin tabeliyində olan Mənəvi Dəyərlərin Təbliği Fondunun dəstəyi ilə həyata keçirilir.

Xatırladaq ki, Alban-Udi xristian dini icması üzvləri daha əvvəl Kəlbəcər rayonundakı Xudavəng monastırını və Laçın rayonundakı Ağoğlan məbədini ziyarət ediblər.