Lüksemburq Ukraynanın enerji sektoruna növbəti yardım tranşı ayırıb

Lüksemburq hökuməti Ukraynanın Enerji Dəstəyi Fonduna əlavə 10 milyon avro ayırıb.

“Report” “RBK-Ukrayna”ya istinadən xəbər verir ki, bu barədə Ukraynanın energetika naziri German Qaluşenko bildirib.

Onun sözlərinə görə, alınan vəsait Rusiyanın hücumları nəticəsində hər gün zərər çəkən kritik infrastrukturda təxirəsalınmaz təmir işlərinə yönəldiləcək.

Ölkənin Nazirlər Kabinetində qeyd ediblər ki, 2022-ci ilin aprelində yaradıldığı vaxtdan etibarən fond 33-dən çox donordan 1,16 milyard avrodan artıq vəsait cəlb edib ki, bu da 790-dan çox tədarük müqaviləsi bağlamağa və 669 milyon avro məbləğində öhdəliklər götürməyə imkan verib.