Sinqapurda İsrailə qarşı təxribat hazırlayan şəxslər saxlanılıb

Sinqapur Daxili Təhlükəsizlik Departamenti ölkə daxilində və Yaxın Şərqdə İsrailə qarşı təxribat hazırlayan üç radikalın saxlanıldığını bildirib.

“Report” xarici mətbuata istinadən xəbər verir ki, bu şəxslər ötən ilin noyabrında saxlanılsalar da, hakimiyyət bu gün bu barədə məlumat verib.

Saxlanılanların bir-biri ilə əlaqəsi yoxdur və internet vasitəsilə cəlb ediliblər.

Onlardan biri rəqəmsal marketinq şirkətinin direktoru, digərləri lift mexaniki və mühafizəçidir.

Məlumata görə, bu şəxslər "İsrailə qarşı mübarizə aparmaq" üçün Yaxın Şərqə getməyi planlaşdırıblar.

Saxlanılanlardan biri İran xüsusi xidmət orqanlarına tabe olduğunu və "belə bir tapşırıq alacağı təqdirdə Sinqapurda müxtəlif təxribatlar törədə biləcəyini" bildirib. Lakin onun konkret hücum planları olmayıb.

Departament nümayəndəsinin sözlərinə görə, İsraillə HƏMAS arasında müharibənin başlanmasından bəri Sinqapurda saxlanılan radikalların sayı beşə çatıb.