Azərbaycan və Özbəkistan MSK rəhbərləri əməkdaşlıq məsələlərini müzakirə ediblər

Özbəkistan Mərkəzi Seçki Komissiyasının (MSK) sədri Zayniddin Nizamxocayevin rəhbərlik etdiyi nümayəndə heyəti Azərbaycan Milli Məclisinə növbədənkənar seçkilərin keçirilməsini müşahidə edir. Z.Nizamxocayev Bakıda MSK sədri Məzahir Pənahovla görüşüb.

"Report" xəbər verir ki, bu barədə Özbəkistan Mərkəzi Seçki Komissiyasının mətbuat xidməti məlumat yayıb.

Özbəkistanın MSK sədri qeyd edib ki, iki ölkənin seçki orqanları arasında səmərəli əməkdaşlıq həyata keçirilir:

“Seçki prosesinin daha da təkmilləşdirilməsi məqsədilə daim məlumat və qabaqcıl təcrübə mübadiləsi aparılır. Əməkdaşlığın səmərəli formalarından biri də milli seçki kampaniyalarının monitorinqində iştirak etmək üçün müşahidəçilərin qarşılıqlı dəvət edilməsidir”.

Öz növbəsində, M.Pənahov belə əməkdaşlığın Azərbaycanda azad və demokratik seçkilərin keçirilməsinə töhfə verəcəyinə əminliyini ifadə edib.