Azərbaycanda Halal Biznes və Turizm Forumu keçiriləcək

Bakıda keçirilən İslam Ticarət, Sənaye və Kənd Təsərrüfatı Palatasının Direktorlar Şurasının 35-ci iclası çərçivəsində İqtisadiyyat Nazirliyi yanında Kiçik və Orta Biznesin İnkişafı Agentliyi (KOBİA), Dövlət Turizm Agentliyi, Islam Ticarət, Sənaye və Kənd Təsərrüfatı Palatası (ICCIA), Beynəlxalq İslam Biznesi Assosiasiyası, və "Caspian Event Organisers" MMC arasında imzalanmış Anlaşma Memorandumu Azərbaycanda Halal Biznes və Turizm Forumunun keçirilməsini nəzərdə tutur.

"Report" bu barədə Agentliyə istinadən xəbər verir.

Sənədi KOBİA-nın İdarə Heyətinin sədri Orxan Məmmədov, Dövlət Turizm Agentliyinin sədri Fuad Nağıyev, İslam Biznesi Beynəlxalq Assosiasiyasının prezidenti Marat Kabayev, ICCIA-nın Baş katibi Yusif Xələvi və “Caspian Event Organisers”in icraçı direktoru Bəhruz Hidayətzadə imzalayıblar. Anlaşma Memorandumu 2024-cü ildə Azərbaycan Halal Biznes və Turizm Forumunun keçirilməsi ilə əlaqəli məsələlər üzrə birgə fəaliyyəti, müştərək layihələrin icrası üçün tədbirlərin keçirilməsi üzrə qarşılıqlı əməkdaşlığı tənzimləyir. Forumun məqsədi İslam Əməkdaşlıq Təşkilatı çərçivəsində özəl sektor arasında əməkdaşlığın daha da genişləndirilməsini təşviq etməkdir. “Eurasiya Development”, MÜSİAD Azərbaycan və Türkiyə-Azərbaycan İş Adamları və Sənayeçiləri İctimai Birliyi (TUİB) forumun tərəfdaşlarıdır.

Həmçinin, tədbir çərçivəsində KOBİA və ICCIA arasında əməkdaşlıq haqqında Anlaşma Memorandumu imzalanıb. Sənədi KOBİA-nın İdarə Heyətinin sədri Orxan Məmmədov və ICCIA-nın Baş katibi Yusif Xələvi imzalayıblar. Memorandumda Azərbaycan və ICCIA-ya üzv olan ölkələrin iş adamları, xüsusilə KOB subyektləri arasında ticarət və investisiya sahəsində əməkdaşlığın təşviqi məqsədilə məlumat və təcrübə mübadiləsi, KOB-lar arasında əlaqələrin gücləndirilməsi üçün müxtəlif tədbirlərin təşkili, birgə proqram və layihələrin reallaşdırılması nəzərdə tutulur.

ICCIA-nın Direktorlar Şurasının 35-ci iclasının açılış mərasimindəki çıxışında O.Məmmədov Agentliyin İslam Əməkdaşlıq Təşkilatının qurumları ilə əməkdaşlığa önəm verdiyini qeyd edib, ICCIA ilə gələcək əməkdaşlıq istiqamətləri barədə məlumat verib. Qeyd olunub ki, KOBİA yerli və xarici biznes dairələri arasında əlaqələrin qurulmasına dəstək göstərir. Agentlik Qarabağda biznes fəaliyyəti ilə məşğul olmaq istəyən ICCIA-ya üzv ölkələrin investorlarına da dəstək ola bilər.