Fuad Nağıyev: "Turizm qeyri-neft sektorunun aparıcı sahələrindən birinə çevrilir"

Son illər Azərbaycanda turizmə dövlət səviyyəsində diqqət göstərilməsi sayəsində bu sahə qeyri-neft sektorunun aparıcı sahələrindən birinə çevrilir.

"Report" xəbər verir ki, bunu Dövlət Turizm Agentliyinin sədri Fuad Nağıyev bu gün Bakıda keçirilən, Ümummilli Liderin yubileyinə həsr olunmuş “Turizm və rekreasiya XXI əsrdə: Problemlər və perspektivlər” adlı VI Beynəlxalq Elmi-Praktiki Konfransa ünvanladığı video-müraciətdə bildirib.

"Prezident İlham Əliyevin davam etdirdiyi inkişaf siyasəti və turizmə göstərdiyi diqqət qarşıya qoyulmuş tapşırıq və hədəflərin daha effektiv və səmərəli icrasına şərait yaradır. Bu müddət ərzində turizm sahəsinin davamlı inkişafı ixtisaslı kadrların hazırlanması zərurətini yaradıb. Bu mənada Dövlət Turizm Agentliyinin tabeliyində olan turizm təhsil müəssisələrinin son illər qət etdikləri inkişaf yolunu, ölkədə turizm mütəxəssislərinin hazırlanmasına verdikləri töhfəni qeyd edə bilərik .

Son 17 il ərzində turizm üzrə ixtisaslaşmış peşə, orta ixtisas və ali təhsil müəssisələri yaradılıb, həmçinin turizmlə əlaqədar yeni ixtisaslar yaradılıb, mövcud olan ixtisasların kurrikulumları hazırlanaraq inkişaf etdirilib. Sevindiricidir ki, hazırda Agentliyin tabeliyində olan 3 turizm təhsili müəssisəsindən başqa ölkəmizdə ümumilikdə 17 ali təhsil müəssisəsi, 16 orta ixtisas təhsil müəssisəsi turizm sahəsi üzrə təhsil verir. Bizim əsas məqsədlərimiz sırasında ilk yerlərdən birini hər zaman turizm təhsilinin keyfiyyətinin artırılması tutub. Peşəkar kadrların yetişdirilməsi bizim üçün olduqca əhəmiyyətli amildir", - deyə o qeyd edib.