Azərbaycan Türk Dövlətləri Təşkilatının turizm üzrə iclaslarında təmsil olunub

Qırğızıstanın Cəlal-Abad şəhərində keçirilmiş Türk Dövlətləri Təşkilatına (TDT) üzv dövlətlərin Turizm nazirlərinin 9-cu iclası və Turizm üzrə işçi qrupunun 19-cu iclasında Azərbaycanın BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyasına (COP29) ev sahibliyi haqqında məlumat verilib.

"Report" bu barədə Dövlət Turizm Agentliyinə istinadən xəbər verir.

İclas çərçivəsində Azərbaycan tərəfinin təşəbbüsü ilə yaradılmış Xizək Kurortları İttifaqı haqqında geniş məlumat verilib. Hazırda 4 ölkənin (Azərbaycan, Qazaxıstan, Türkiyə və Özbəkistan) üzv olduğu ittifaqa digər TDT ölkələri də dəvət edilib.

Bununla yanaşı, TDT çərçivəsində növbəti ilə ərzində keçirilməsi nəzərdə tutulan tədbirlərin gündəliyi müzakirə olunub, üzv dövlətlərin turizm şirkətləri və mövcud hava yollarının iştirakı ilə təşkil ediləcək B2B formatlı Turizm Forumunda iştirakda ölkəmizin maraqlı olduğu qeyd edilib.

Turizm nazirlərinin 9-cu iclasında çıxış edən Dövlət Turizm Agentliyinin sədrinin müşaviri Kənan Quluzadə bu ilin noyabrında Azərbaycanın COP29-a ev sahibliyi edəcəyi haqqında tədbir iştirakçılarına ətraflı məlumat verib. O, ilk dəfə COP29-un tematik proqramına turizm mövzusunun inteqrasiya edildiyini və 20 noyabrın "Turizm günü" olaraq təyin edildiyini vurğulayıb.

"Turizm günü" çərçivəsində təşkil ediləcək "Turizm sahəsi üzrə Təkmilləşdirilmiş İqlim Fəaliyyəti üzrə Nazirlərin yüksək səviyyəli 1-ci Görüşü"nə üzv dövlətlərin turizm nazirləri dəvət edilib.