Hökumət sözçüsü: "ABŞ Türkiyə ilə qarşı-qarşıya gəlməməlidir"

Bakı. 31 yanvar. REPORT.AZ/ “Türkiyə ilə ABŞ qarşı-qarşıya gəlməməlidir”.

"Report" "Haber7"yə istinadən xəbər verir ki, bunu Türkiyə baş nazirinin müavini, hökumət sözçüsü Bekir Bozdağ Münbiç və Fərat çayının şərqində keçiriləcəyi gözlənilən antiterror əməliyyatı ilə bağlı bildirib.

“Zeytun budağı” əməliyyatının sərhədi Afrin bölgəsidir. Münbiç və Fərat çayının şərqində keçiriləcək əməliyyatlar isə başqa hərəkatlardır. Biz Afrin hərəkatı başa çatdıqdan sonra Türkiyənin orada dayanacağını heç vaxt demədik. Türkiyə və ABŞ qarşı-qarşıya gəlməməlidir. Biz bunun baş verməməsi istiqamətində fəaliyyət göstəririk. ABŞ-ın həmin ərazidəki səlahiyyətlilərini bu məsələ ilə bağlı xəbərdar etmişik. Onların da Fəratın şərqində və Münbiçdə Türkiyə ilə qarşı-qarşı gəlməməsinə diqqət etməsi lazımdır”, - o bildirib.