Rusiyada yüz minlərlə dövlət qulluqçusu ixtisara düşəcək

Rusiyada 2025-ci il iyulun 1-dən dövlət orqanlarının ərazi bölmələrinin 10 faiz işçisi ixtisara düşəcək.

“Report” xəbər verir ki, bu barədə “Kommersant” yazıb.

Optimallaşdırma təxminən 400 min nəfərin işlədiyi bölmələrə təsir edəcək. Nəşrin məlumatına görə, ixtisara düşəcək şəxslərin məvacibləri qalanların maaşlarının artırılmasına yönəldiləcək.

İnzibati islahatlara nəzarət edən Rusiya Baş nazirin müavini və hökumət aparatının rəhbəri Dmitri Qriqorenkonun katibliyi ixtisara düşənlərin sayının daha çox ola biləcəyini vurğulayıb.

Bu onunla əlaqədardır ki, yeni sistemdə ərazi orqanları rəqəmsallaşmanı nəzərə almalı olacaqlar ki, bu da kadrlara olan tələbatı xeyli azaldacaq.