Rusiya XİN başçısının müavini və İran səfiri yüksək səviyyəli gələcək təmasları müzakirə ediblər

Rusiya xarici işlər nazirinin müavini Andrey Rudenko və İranın Moskvadakı səfiri Kazem Cəlali bu gün iki ölkə arasında yüksək səviyyəli gələcək təmasları müzakirə ediblər.

“Report” Rusiya mətbuatına istinadən xəbər verir ki, bu barədə Rusiya XİN məlumat yayıb.

"İkitərəfli gündəliyin aktual məsələləri, o cümlədən yüksək səviyyəli gələcək təmaslar müzakirə olunub", - məlumatda qeyd edilib.

Daha əvvəl Cəlali bildirmişdi ki, Rusiya ilə İran arasında hərtərəfli strateji tərəfdaşlıq müqaviləsi yanvarın 17-də Moskvada iki ölkə liderləri arasında danışıqlar zamanı imzalanacaq.