Peskov: BƏƏ-dəki danışıqlarda Rusiyanı Müdafiə Nazirliyinin nümayəndələri təmsil edəcək

BƏƏ-də ABŞ-Rusiya-Ukrayna üçtərəfli danışıqlarında Rusiya nümayəndə heyəti tamamilə Müdafiə Nazirliyinin təmsilçilərindən ibarət olacaq.

"Report" Rusiya KİV-ə istinadən xəbər verir ki, bu barədə ölkə Prezidentinin mətbuat katibi Dmitri Peskov bildirib.

"Onların hamısı hərbçilər, Müdafiə Nazirliyinin təmsilçiləridir. Hələ ki onların adlarını açıqlamayacağıq", - o qeyd edib.

Mətbuat katibinin sözlərinə görə, dünən axşam nümayəndə heyətinin üzvləri Rusiya Prezidenti Vladimir Putindən təlimatlar alıblar.

D.Peskov vurğulayıb ki, üçtərəfli qrup cümə günü və lazım gələrsə, şənbə günü Əbu-Dabidə toplaşacaq:

"Yəni danışıqlar məhz bu gün və lazım olarsa, sabah keçiriləcək".