KİV: Putin və Ərdoğan arasında görüş avqustun 31-də baş tuta bilər

Rusiya və Türkiyə Prezidentləri - Vladimir Putin və Rəcəb Tayyib Ərdoğan arasında görüş avqustun 31-də baş tuta bilər.

“Report” xəbər verir ki, bu barədə “SHOT” teleqram kanalı məlumat yayıb.

Məlumata görə, bu tarixdə görüşün keçirilməsi hazırda razılaşdırılır, sadəcə nüanslar qalıb.

“Türkiyə və Rusiya Prezidentlərinin avqustun 31-də mümkün görüşü barədə Türkiyə tərəfində hələlik konkret məlumat yoxdur”.

Bu barədə TASS-a Ərdoğan administrasiyasının mətbuat xidmətindən məlumat verilib.

"Hazırda bu məsələ ilə bağlı heç nə deyə bilmərik. Əgər belə bir qərar varsa, konkretliklər ortaya çıxsa, o zaman bu barədə məlumat verəcəyik. Hələlik deyiləcək bir şey yoxdur", - administrasiyadan bildiriblər.