İran XİN: “Regionda başqa qüvvələrin olması sabitliyi pozur”

“Regionda başqa aktorların olması nəinki faydasızdır, həm də sabitliyi pozur”.

"Report" xəbər verir ki , bu barədə İran Xarici İşlər Nazirliyinin ( XİN) mətbuat katibi Naser Kənani mətbuat konfransında bildirib.

Onun sözlərinə görə, region ölkələrinin təhlükəsizliyini eyni ölkələr təmin etməlidir:

"Təcrübə göstərdi ki, regiondankənar ölkələr həmişə öz maraqlarını güdürlər və onların mövcudluğu heç vaxt faydalı olmayıb. Amerika qüvvələri harada olursa olsun, nəinki təhlükəsizliyi təmin etmir, həm də qeyri-sabitlik və etibarsızlıq yaradırdılar".

İran XİN sözçüsü həmçinin mübahisələrin həlli üçün diplomatik məsləhətləşmələrin vacibliyini vurğulayıb.

Daha əvvəl bildirilmişdi ki, Ermənistan və ABŞ-ın “EAGLE PARTNER 2023” birgə hərbi təlimləri sentyabrın 11-dən 20-dək Ermənistan ərazisində keçiriləcək.

Naser Kenani onu da qeyd edib ki, İran hər zaman ölkələrin ərazi bütövlüyünə hörmətlə yanaşıb və beynəlxalq sərhədlərin hər hansı dəyişikliyinə qarşı çıxıb: "Ermənistan və Azərbaycan tərəfindən hər iki tərəfin ərazi bütövlüyünün qarşılıqlı tanınması dayanıqlı sülh və təhlükəsizliyə nail olmaq üçün mühüm addım olacaq".

O, əlavə edib ki, İran bu prinsiplərə qarşı heç bir addımı dəstəkləmir.