Dmitri Peskov: "Ermənistan nümayəndələri Moskvada ölkədəki böhranın həlli yollarını müzakirə ediblər"

Bakı. 27 aprel. REPORT.AZ/ Ermənistan nümayəndələri Moskvaya səfərləri zamanı ölkədəki böhranın tezliklə həll edilməsini müzakirə ediblər.

"Report" TASS-a istinadən xəbər verir ki, bu barədə Rusiya prezidentinin mətbuat katibi Dmitri Peskov bildirib.

"Qurumlar xətti ilə danışıqlar aparılıb, eləcə də telefon danışığı olub (Rusiya prezidenti Vladimir Putin ilə baş nazir əvəzi Karen Karapetyan arasında). Danışıqlar Ermənistanda mövcud olan siyasi böhranın konstitusiya çərçivəsində, bütün maraqlı tərəflər arasında konsensus tapılması yolu ilə tezliklə həlli ilə bağlı olub", - D.Peskov deyib.

Onun sözlərinə görə, Kreml mayın 1-də Ermənistan parlamentində keçiriləcək baş nazir seçkilərini müşahidə edir.