Prezident: "Dəyəri 10 milyard dollardan çox olan layihələrdə türk şirkətləri iştirak ediblər"

"Türkiyədən olan şirkətlər artıq layihələrdə yer alıblar. Füzuli-Şuşa avtomobil yolunun inşası ilə bağlı türk şirkətləri artıq fəaliyyətdədirlər. Göygöldən Kəlbəcərə çəkilən yolda da türk şirkətləri çalışır. Bu da mürəkkəb və çətin ərazidən keçir. Orada tunellər qazılmalıdır. Artıq ilkin razılaşmalar əldə edilir".

“Report”un xəbərinə görə, bunu Azərbaycan Prezidenti İlham Əliyev bu gün yerli və xarici jurnalistlər üçün videoformatda keçirdiyi mətbuat konfransında "HaberGlobal" TV-nin əməkdaşının sualını cavablandırarkən deyib.

"Paralel olaraq Türkiyə şirkətləri bundan əvvəl də Azərbaycanda fəal idi. Dövlət xətti ilə icra olunan layihələrdə ən çox yer alan Türkiyə şirkətləridir. Dəqiq rəqəmlər xatırlamıram, ancaq haradasa 10 milyard dollardan çox dəyəri olan layihələrdə türk şirkətləri müxtəlif inşaat layihələrində Bakı və bir çox yerlərdə iştirak ediblər. Görüləcək işlərin həcmi çox böyükdür və bu barədə Rəcəb Tayyib Ərdoğanla dəfələrlə danışmışıq. Bütün bu işləri birgə edəcəyik. Türkiyə şirkətlərinin buradakı fəaliyyəti üçün yeni imkanlar yaranacaq", - dövlət başçısı əlavə edib.