Nazirlik tanınmış aktyorların işdən çıxarılmasına münasibət bildirib: "Teatr yeni nəfəsə ehtiyac duyur"

Mədəniyyət Nazirliyi Azərbaycanın tanınmış aktyorları - Xalq artistləri Valeh Kərimov, Hacı İsmayılov, Əli Nur, Ramiz Məlik və Səidə Quliyevanın işdən çıxarılmasına aydınlıq gətirib.

Nazirlikdən "Report"un sorğusuna cavab olaraq bildirilib ki, mövcud qanunvericilikdə 65 yaşına çatmış şəxslərin təqaüdə çıxması nəzərdə tutulur.

Bildirilib ki, mədəniyyət, elm, təhsil kimi sahələrdə çalışanlarla bağlı istisna halları mövcuddur: "Elmi və fəxri adları olan şəxslərlə müqavilələr 75 yaşına qədər uzadıla bilər. Bu, həmin şəxsin çalışdığı müəssisənin səlahiyyətində olan məsələdir. Mədəniyyət Nazirliyi olaraq belə məsələlərə olduqca həssas yanaşırıq. Lakin qanunvericilikdə göstərilir ki, bir müəssisədə yaşı 65-i ötən əməkdaşların sayı orada çalışan əməkdaşların sayının 2 faizini təşkil etməlidir".

Nazirlikdən vurğulanıb ki, əksər teatrlarda bu gün də qocaman sənətkarlar çalışır: "İstənilən teatrın səhnəsində belə qocaman sənətkarlarımızın ifasında müxtəlif tamaşalara baxmaq mümkündür. Ancaq bir gerçəkliyi də unutmaq olmaz ki, Azərbaycan Dövlət Mədəniyyət və İncəsənət Universitetini hər il onlarla tələbə aktyor, rejissor, teatrşünas bitirir. Ölkədə isə cəmi 25 dövlət teatrı fəaliyyət göstərir. Bu məzunların teatrlarda işlə təmin olunması ciddi problemə çevrilir. Məlum olduğu kimi, teatr elə bir sənət növüdür ki, daim yeni nəfəsə, yeni istedadlara ehtiyac duyur. Teatrların ştatları isə məhdud saydadır və stabildir".

Mədəniyyət Nazirliyindən vurğulanıb ki, teatrlarda kadr dəyişikliyi labüddür: "Ona görə də, imkan daxilində biz həm gənclərin işlə təmin olunmasına, gənclərə meydan verilməsinə, həm də qocaman sənətkarlarımızın uzunillik təcrübəsindən faydalanmağa çalışırıq".

"Vaxtilə təqaüdə çıxan aktyorlarla bağlı məsələyə aydınlıq gətirərək bildiririk ki, qeyd etdiyiniz tanınmış aktyorlarımızın son 2 ildə işdən çıxarılması ilə bağlı fikirlər həqiqətə uyğun deyil. Adları çəkilən aktyorlarla çalışdığı teatrlar arasında müqavilələr mövcuddur və bu müqavilələrə əsasən sevilən aktyorlarımız bu gün də səhnədədir", - nazirlikdən vurğulanıb.

Vurğulanıb ki, Hacı İsmayılov, Əli Nur və Səidə Quliyeva müqavilə ilə teatrda çalışır və aylıq maaş alırlar.

Akademik Milli Dram Teatrının mətbuat xidmətinin rəhbəri Cavid Zeynallı isə "Report"a bildirib ki, “Azdrama”da işəmuzd işləyən aktyor yoxdur: “Hamısı ştat cədvəli üzrə maaş alırlar. İlham müəllimlə danışdım. Mətbuatda gedən açıqlama ilə bağlı nəsə anlaşılmazlıq olub, yaxud düz yazılmayıb”.

Qeyd edək ki, teatrşünas alim, professor İlham Rəhimli teatrlarda yaşı 65-i keçən aktyor və aktrisaların ya işdən çıxarıldığını, ya da işəmuzd işlədiyini bildirib.

Xatırladaq ki, Xalq artisti V.Kərimov Sumqayıt Dövlət Dram Teatrının, H.İsmayılov, Ə.Nur, R.Məlik və S.Quliyeva isə Akademik Milli Dram Teatrının aktyorlarıdır.