Azərbaycanlı skripkaçı Parisdə “Yeni ulduzlar” müsabiqəsinin konsertində çıxış edib

Azərbaycanlı skripkaçı Fransanın paytaxtı Parisdə keçirilən “Yeni ulduzlar” müsabiqəsinin qaliblərinin konsertində çıxış edib.

“Report”un Fransa bürosu xəbər verir ki, beynəlxalq müsabiqələr laureatı, skripkaçı Surə Rüfət Parisin Notr-Dam-d'Esperans kilsəsində “Yeni ulduzlar” müsabiqəsinin qaliblərinin konsertində Azərbaycanı təmsil edib.

Gənc virtuozlar Antonio Vivaldi, Sebastyan Bax, Volfqanq Motsart və digər bəstəkarların əsərlərini ifa ediblər.

Azərbaycanlı gənc və istedadlı musiqiçinin ifası alqışlarla qarşılanıb. Surə öz parlaq və yaddaqalan ifası ilə dinləyicilərin ruhunu oxşaya bilib.

Qeyd edək ki, azərbaycanlı skripkaçı müxtəlif ölkələrdə, o cümlədən Belçika, İsveçrə, İngiltərə, Fransada keçirilmiş bir çox beynəlxalq müsabiqələrin qalibi olub.