Tokio birjasında əsas indekslər uzun fasilədən sonra ilk dəfə 30 min bəndi keçib

Tokio Fond Birjasının əsas indeksləri bazar ertəsinin yekununda 30 ildən çox müddətdə ilk dəfə 30 min bənddən çox olub.

“Report” TASS-a istinadən xəbər verir ki, ölkənin 225 aparıcı şirkətinin səhmlərindəki tərəddüdləri əks etdirən “Nikkei” indeksi fevralın 12-si ilə müqayisədə 1,9% artaraq 30 084,15 bəndə çatıb. Birjanın elit birinci hissəsindəki bütün şirkətlərin səhm qiymətlərini əks etdirən daha geniş TOPIX indeksi isə 1,04% artaraq 1 953,94 bənd təşkil edib.

“Kyodo” agentliyinin məlumatına görə, artım Yaponiyanın Maliyyə Nazirliyinin açıqladığı və 2020-ci ilin son rübündə ölkənin ÜDM-də 3% artım olduğunu göstərən statistik məlumatlarla əlaqədar investorların Yaponiya iqtisadiyyatında canlanma ümidlərindən qaynaqlanır.