IAIS: Qlobal sığorta bazarının aktivləri 40 trilyon dollara çatıb

Bu il qlobal sığorta bazarının cəmi aktivləri müsbət bazar meyillərinin təsiri ilə 2,7 % artaraq 40 trilyon ABŞ dollarına çatıb.

“Report” xəbər verir ki, bu barədə Beynəlxalq Sığorta Nəzarətçiləri Assosiasiyasının (IAIS) hesabatında bildirilir.

Sənədə əsasən, hesabat dövründə sığorta bazarının cəmi öhdəlikləri 2,4 % artaraq 34 trilyon ABŞ dolları olub. Öhdəliklərdəki artımın əsas səbəbi mükafatlarla bağlıdır.

Sığortaçıların ödəmə qabiliyyəti və gəlirlilik mövqeləri, güclü anderraytinq performansı və möhkəm investisiya gəlirlərinin təsiri ilə sabit qalıb. Onların mənfəətliliyi güclü kapital və əlverişli maliyyə bazarı şərtləri ilə dəstəklənib. 2024-2025-ci illərdə sığorta sektorunun mənfəətliliyinin sabit qalacağı və yaxud artacağı gözlənilir.