Azərbaycan həndbolçuları narazıdır: Nazirə məktub yazıblar

Azərbaycan həndbolçuları narazıdır: Nazirə məktub yazıblar "Bakı" və "Məhsul" klublarında çıxış edən həndbolçular məşqləri boykot etməyə qərara alıblar
Komanda
1128
10 Noyabr , 2021 16:15
Azərbaycan həndbolçuları narazıdır: Nazirə məktub yazıblar

Azərbaycanın kişilərdən ibarət "Bakı" və "Məhsul" klublarının həndbolçuları məşqləri boykot etməyi qərara alıblar.

Bu barədə "Report"a müraciət edən hər iki komandanın aparıcı oyunçuları məlumat veriblər.

Onlar müvafiq qaydada gənclər və idman naziri Fərid Qayıbova məktub ünvanladıqlarını bildiriblər.

Cavid İsmayılov: "Hər oyunçunun maaşından özbaşına 20 manat pul tutulur"

Özünü Azərbaycan millisinin və "Məhsul"un kapitanı kimi təqdim edən Cavid İsmayılov avqustdan maaşlarının kəsildiyini söyləyib: "Maaşlarımızı qat-qat aşağı salıblar və idman zallarımızı bağlayıblar. Federasiya isə deyir ki, budur, istəyirsiniz edin, istəmirsiniz yox. Amma bu federasiyanın ilk vaxtlarında hər şey qaydasında idi. Hər oyunçunun maaşından özbaşına 20 manat pul tutulur. Deyirlər ki, büdcəyə yığılır. Amma hansı büdcədir, bilmirik. Rəhbərliyin təyin olduğu ilk ildə belə deyildi. Maaşlar artıqlaması ilə verilirdi".

İsmayılov əsas şikayətinin federasiyanın baş katibi Yusif Atakişiyevdən olduğunu diqqətə çatdırıb: "Biz bu gün komanda şəklində onunla görüş təşkil etmək niyyətindəyik. Gənclər və idman naziri Fərid Qayıbova da məktub göndərəcəyik. Uşaqların hamısı bunu imzalayacaq. Federasiyaya zəng edirik, komandanı sakitləşdirmək üçün yalnız məni görüşə çağırırlar. Mən də tək görüşmək istəmirəm. Komanda şəklində görüşmək istəyirik. Maaşları 2 dəfə endiriblər. Əvvəllər 600 manat alan idmançı indi 300 manat alır".

Cavid İsmayılov
Cavid İsmayılov

Həndbolçu 2019-cu ildə yığmanın baş məşqçisi Hikmət Abdullayevin vəfatından sonra vəziyyətin daha da pisləşdiyini sözlərinə əlavə edib. İsmayılov milli komandanın "Məhsul" və "Bakı" komandalarından formalaşdığını, lakin baş məşqçilərin idmançılara bu yöndə dəstək vermədiklərini vurğulayıb.

İsmayılov məşq üçün zallarının olmadığını diqqətə çatdırıb: "Əvvəllər ABU Arenada məşq edirdik. Onu da əlimizdən alıblar. Daha sonra Respublika Olimpiya Mərkəzində məşq edirdik. İndi yeganə məşq yerimiz Daxili İşlər Nazirliyinin İdman Cəmiyyətidir. Bu gün saat 19:00-da burada məşq nəzərdə tutulub. Amma məşqə çıxmayacağıq. Bütün həndbolçularla federasiya rəhbərliyini gözləyəcəyik. Bütün bayramlarda bizi məşqlərə çağırırlar. İstirahət günümüz yoxdur. Federasiyamızda özbaşınalıqdır, bəziləri həndboldan anlayışı olmayan şəxslərdir. Məsələn, mən hüquqşunasam, amma taksi sürürəm. 2022-ci ildə Türkiyənin Konya şəhərində İslam Həmrəyliyi Oyunları keçiriləcək. Təlim-məşq toplanışları, hazırlıqlar olmalıdır. Başqa idman növlərində inkişaf görürük. Mənim və digər həndbolçuların danışacağı yüzlərlə söz var. Məşqçilər də bizə dəstək olmurlar. Mənim timsalımda bütün komanda yoldaşlarımız hamısını danışmağa hazırıq".

Kamran Məmmədov
Kamran Məmmədov

Kamran Məmmədov: "İrəli durmursansa, deməli, sən də onlarla əlbirsən"

"Bakı" klubunun üzvü Kamran Məmmədov da həmkarı kimi maaşların kəsilməsindən şikayətlənib: "Federasiyaya gələndə dedilər ki, bu idman növünü inkişaf etdirəcəyik. İlk ildə qızlardan ibarət komandalara legionerlər gətirdilər. Komandalar yaratdılar və kişilərin çempionatı da yaxşı alındı. Həmin vaxt 650 manat maaş alırdıq. Birinci ili gəldilər, çempionat keçirdilər və xaricdən oyunçular dəvət etdilər. Göstərmək istədilər ki, biz nəsə edirik. İlk ildə maraqlı çempionatımız oldu. Ondan sonra isə başladılar voleyboldakı kimi strategiyanı dəyişməyə. Həmin legionerləri göndərdilər, maaşlar kəsildi. Məşqçilərə 900 - 1 000 manat təklif edirlər. Onlar da bu səbəbdən bizim yanımızda deyillər. Heç kim irəli durmur. Halbuki uşaqlar artıq bezib. İrəli durmursansa, deməli, sən də onlarla əlbirsən. Pandemiyaya görə, qışda Dövlət Bədən Tərbiyəsi və İdman Akademiyasının stadionda məşq etmişik".

Məmmədov şəraitsizlikdən də şikayətlənib: "Pul verməsinlər deyə, iki komanda bir zalda məşq edir. Toplar da ki, çürüyüb, pis vəziyyətdədir. Xarici səfərlər də yoxdur. 17 ildir ki, bu idman növündəyəm, yığmanın aparıcı üzvü olmuşam. Əvvəl federasiya pis gündə olsa da, səfərlər var idi, forma verirdilər. Bunlar yaxşılaşdırmaq üçün gəlmişdilər, amma hər şey bərbad vəziyyətdədir. 2019-cu ildə Norveçdəki seçmə oyunda formam cırılanda utandım. Onu yapışdırdıqdan sonra görüşə davam etmişəm".

"Bakı"nın oyunçusu da ötən ay maaşından kəsildiyini söyləyib: "Pandemiyadan əvvəl maaşlar kəsilməyə başlayanda getdim Yusif Atakişiyevlə söhbət etdim. Ona dedim ki, niyə maaşları kəsirsiniz? Hansı peşəkar idmanda idmançını 4 ay istirahətə buraxırlar? Tətildən qayıdanda necə bərpa olunacağıq? Maaş verməmək üçün bunu edirdilər. Bütün bunları deyəndən sonra mən "qara siyahı"ya düşdüm. Bu il komandalar yığılanda məşqçilərə təzyiq göstərirdi ki, Kamranı götürməyin. Ona deyəndə ki, niyə belə edirsən? Cavab verir ki, hamısını klubların məşqçiləri edir. Məşqçi onun təzyiqindən sonra necə götürsün məni? Az qalmışdı ki, kənarda qalım, axırda məni 400 manat maaşla "Bakı"ya götürdülər. Məcbur qalıb, alternativ işdə işləyirəm. Həmişə belə məşq etmişik və saat 19:00-dan sonra hazırlıqlara qoşulmuşuq".

Məmmədov millinin hazırkı məşqçilər heyətindən narazılığını da ifadə edib: "Millinin baş məşqçisi Hikmət Abdullayev rəhmətə gedəndən sonra daha da çox dərəbəylik oldu. Ondan sonra Vidadi Əliyev baş məşqçi təyin olundu. Mən 14 yaşımdan bu idmandayam. Onu 2017-ci ildə görməyə başlamışam. Federasiyadakı dəyişikliklərdən sonra birdən-birə peyda oldu. Həyatımızda görmədiyimiz insanlar ortalığa çıxdı. Həndbol bizim ölkədə zəif olmayıb, sadəcə, diqqətsizlik bu idman növünü bu hala salıb. Qonşu ölkələrdən Türkiyə, Gürcüstan və İran SSRİ dönəmində bizdən öyrəniblər. Amma indiki dönəmdə onların həndbolu düzgün strategiya və planlamaya görə bizdən qat-qat üstündür. Bizim federasiyanın rəhbərliyindən bir nəfər tanımıram ki, həndboldan başı çıxsın".

Yusif Atakişiyev: "Bizdə ağ və ya qara siyahı yoxdur"

Azərbaycan Həndbol Federasiyasının (AHF) baş katibi Yusif Atakişiyev isə həndbolçuların açıqlamalarına belə münasibət bildirib: "Son 1,5 ildə pandemiya idi. Biz də avqustda məşqlərə başlamışıq. Daxili İşlər Nazirliyinin İdman Cəmiyyətində məşqlər edirik, "ABU Arena"da məşq üçün hələlik imkan yoxdur. Federasiya olaraq, orada məşq imkanı əlimizdən alınıb. Bunu istəyərək etməmişik. "ABU Arena"nın özündə müəyyən problemlər var. Bütün klublar Daxili İşlər Nazirliyinin İdman Cəmiyyətində yerləşib".

Yusif Atakişiyev
Yusif Atakişiyev

Atakişiyev idmançıların maaşdan narazılıqlarına da reaksiya verib: "Maaşı federasiya müəyyən etmir. Bu idmançıların hərəsinin öz klubu var. Federasiya sadəcə olaraq, klubları maliyyələşdirir. Bu, tam başqa şeydir. Heyəti isə klub özü yığır. Biz sadəcə, maliyyə tərəfdən köməklik edirik. İdmançıların əksəriyyətinin maaşı dəyişməyib. Əlbəttə, insan yaşlaşdıqca maaş dəyişiləcək. Normal haldır. Kimsə bir az və ya az alır. Maaşlar fərqlidir. Mövsümdən-mövsümə isə rəqəmlər dəyişilir. İdmançı zəifləyə və yaşlaşa da bilir. Cavanlar isə öz çıxışlarını artıranda istər-istəməz əmək haqları artır. Bütün bunlar klubdaxili işlərdir. Bizim kişi həndbolçuların əsas problemi əlavə işlə məşğul olmalarıdır. Ona görə məşqlərə 19:00-dan tez gələ bilmirlər. Kamran Məmmədov ötən ay işi ilə əlaqədar 21 məşqdən 15-nə gəlməyib".

Baş katib "Bəlkə idmançı kimi maaşı qane etmədiyi üçün başqa yerdə işləyir?" sualına isə belə cavab verib: "Bu həndbolçu 15 ildir işləyir. Dünən başlamayıblar ki, işləməyə. Biz 2016-cı ilin dekabrında federasiyaya gələndə həndbolçuların əksəriyyəti işləyirdi. Heç kimi onu federasiyada sıxışdırmır. Heç kiminlə prinsipimiz yoxdur. Bizdə ağ və ya qara siyahı da yoxdur. Sadəcə, idmançıdan tələbimiz var ki, məşqlərə gəlsin və oyunlarda iştirak etsin. 21 məşqdən 15-də iştirak etməmək peşəkarlıqdırmı"?

Saleh Məmmədov
Saleh Məmmədov

Baş katib bu gün həndbolçularla görüşməyə hazır olduğunu sözlərinə əlavə edib: "Mən Cavidlə və digər həndbolçularla danışmışam. Kimin nə problemi varsa, oturaq söhbət edək. Kamran Məmmədovun isə məşqə gəlməyərək maaş tələb etməsi absurddur. Bu gün saat 19:00-da görüşmək istəyirlər. Bəlkə həmin vaxt məndə alınmadı. Amma istənilən vaxt görüşə bilərik. Onların problemləri mənim özümə də maraqlıdır. Maaş azalmasıdırsa, bunu klublar müəyyən edir. Hərəsinin də özünün maliyyə imkanları var. Cavid İsmayılovu götürək. Aldığı maaş onu razı salmırdısa, niyə razılaşırdın? Axı, bu, dünən olmayıb. Komanda artıq 3 aydır ki, məşqlərə başlayıb".

Federasiya rəsmisi məvaciblərin pandemiyadan əvvəl fərqli olduğunu etiraf edib: "Pandemiyanın da bu məsələyə təsiri olub. 1,5 ildir ki, zallar bağlı idi. Ötən il pandemiya dönəmində maaş alıblar. Bunu niyə demirlər? Çempionat keçirilmirdi, zallar bağlı idi. Niyə bunu xatırlamırlar? Yayda istirahətə göndərmək məsələsinə gəlincə, bütün idman növlərində belədir. Mövsüm avqustda başlayır və mayda bitir. Bu dəfə istirahət bir az çox oldu, buna səbəb isə pandemiya idi".

Atakişiyev maaşlardan 20 manat məbləğində vəsaitin tutulmasını da təkzib edib: "Kim məşqi buraxırsa və səbəbini göstərmirsə onun maaşı kəsilir. Ötən ay "Məhsul"un baş məşqçisi zəng etdi ki, oyunçunun toyudur, 3 günlük istirahət istəyir. Biz də dedik ki, 3 gün yox, 1 həftə olsun. Hətta toy günündə bütün komanda üzvlərinə də istirahət verildi. Məşqi bilinməyən səbəbə görə buraxırlarsa, maaş kəsilir. İşə gəlməməyinin səbəbini göstərməlisən. Düşünürəm ki, bu, hər yerdə belədir".

Qeyd edək ki, AHF-in prezidenti Azərbaycan Avtomobil Yolları Dövlət Agentliyinin İdarə Heyətinin sədri Saleh Məmmədovdur.

Son xəbərlər

Orphus sistemi