RİNN bayram günlərində gücləndirilmiş iş rejimində fəaliyyət göstərəcək

Rəqəmsal İnkişaf və Nəqliyyat Nazirliyi (RİNN) bayram günlərində gücləndirilmiş iş rejimində fəaliyyət göstərəcək.

"Report" xəbər verir ki, bu barədə nazirlik məlumat yayıb.

Bildirilir ki, Novruz və Ramazan bayramı günlərində əhalinin nəqliyyat, poçt, telekommunikasiya, o cümlədən internet, mobil rabitə xidmətləri və radio-televiziya yayımı ilə keyfiyyətli və davamlı şəkildə təmin edilməsi üçün müvafiq tədbirlər həyata keçirilib.

Bununla bağlı RİNN-in qurumlarına, eləcə də mobil və telekommunikasiya operatorlarına, internet xidmət provayderlərinə təlimat göndərilib.

Müvafiq struktur bölmələri xidmətlər üzrə baş verə biləcək problemlərin aradan qaldırılması məqsədilə tam hazır vəziyyətə gətirilib.