Aleksey Borodin : “Azərbaycan regionun rabitə sahəsindəki qurumları üçün örnək olmalıdır”

Azərbaycanın rabitə sahəsində əldə etdikləri regionun telekommunikasiya sahəsindəki qurumları üçün örnək olmalıdır.

“Report” xəbər verir ki, bunu Rabitə sahəsində regional birliyin icra komitəsinin baş direktoru Aleksey Borodin Bakıda keçirilən “GSMA Mobile 360 Eurasia 2024” beynəlxalq konfransında deyib.

"Bütün dünya reytinqlərində Azərbaycanın yüksək yerlər tutduğunu görürük. Azərbaycanın unikal coğrafi mövqeyi onu Şimal-Cənub, Şərq-Qərb kimi mühüm yerüstü tranzit layihələrinin reallaşdırılması zamanı vacib mövqeyə qoyur. Eyni zamanda biz bilirik ki, Azərbaycan Xəzərin dibi ilə fiber optik xətt çəkmək niyyətindıdir. Bu layihənin reallaşması regiona böyük töhfə verə bilər",-deyə o qeyd edib.

A. Borodin Azərbaycanın eyni zamanda beynəlxalq arenada ciddi siyasi səylər ortaya qoyduğunu xüsusi vurğulayıb: "Belə ki, Azərbaycan, regionumuzu Beynəlxalq Telekommunikasiya İttifaqının Şurasında təmsil edir. Biz coğrafi olaraq böyük region olsaq da ancaq ölkələrin sayına görə elə də nəzərə çarpan deyilik. Belə bir şəraitdə Azərbaycanın oynadığı rol daha da əhəmiyyətli olur".