Şəmkirdə mikroavtobus kranla toqquşub, 3 nəfər xəsarət alıb

Gəncə-Qazax-Gəncə reysi ilə sərnişin daşıyan "Mercedes" markalı mikroavtobusun Şəmkir rayonu ərazisində kranla toqquşması nəticəsində xəsarət alanların şəxsiyyəti məlum olub.

"Report"un Qərb bürosunun məlumatına görə, qəza nəticəsində mikroavtobusun sürücüsü, Ağstafa rayonunun Qırlı kənd sakini, 1990-cı il təvəllüdlü Əmiraslanov Bariz Mübariz oğlu, onun sərnişinləri - Tovuz rayonun Əbulbəyli kənd sakini, 1961-ci il təvəllüdlü Musayev Sahib Abbasəli oğlu və Qazax rayon sakini, 1956-cı il təvəllüdlü Əliyeva Tamara Əhməd qızı müxtəlif dərəcəli bədən xəsarətləri ilə xəstəxanaya yerləşdiriliblər. Onlardan sürücünün və T.Əliyevanın vəziyyəti orta-ağır, S.Musayevin vəziyyəti isə ağır qiymətləndirilir. 

Bakı-Qazax avtomobil yolunda mikroavtobusla minik avtomobili toqquşub, bir neçə nəfər xəsarət alıb.

"Report"un Qərb bürosunun məlumatına görə, hadisə Şəmkir rayonunun Könüllü kəndi ərazisində qeydə alınıb.

Belə ki, rayonlar arasında sərnişin daşıyan mikroavtobusun digər minik avtomobili ilə toqquşması nəticəsində bir neçə nəfər xəsarət alıb. Onlar xəstəxanaya yerləşdirilib. Xəsarət alanlardan biri Fariz Əmiraslanovdur, digər xəsarət alanların şəxsiyyəti dəqiqləşdirilir.

Faktla bağlı araşdırma aparılır.