​Baş Prokurorluq zorlamaya görə bəraət alan şəxslərin işi üzrə protest verib

Bakı. 24 dekabr. REPORT.AZ/ Baş Prokurorluq Sumqayıt Apellyasiya Məhkəməsinin hökmündən protest verib. Bu barədə “Report”a Baş Prokurorluğun mətbuat xidmətindən bildirilib.

Belə ki, yetkinlik yaşına çatmayan 4 nəfər Abşeron rayon sakininin Cinayət Məcəlləsinin 150 (seksual xarakterli zorakılıq hərəkətləri) və 182-ci (hədə-qorxu ilə tələb etmə) maddələri ilə təqsirləndirilmələrinə dair cinayət işi üzrə Bakı Ağır Cinayətlər Məhkəməsinin hökmü ilə bir şəxs 6 il 6 ay, digərlərinin hər biri isə 5 il 6 ay müddətə azadlıqdan məhrum etmə cəzasına məhkum ediliblər.

Müdafiə tərəfinin apellyasiya şikayətinə əsasən Sumqayıt Apellyasiya Məhkəməsinin Cinayət Kollegiyasının 23 dekabr tarixli hökmü ilə Bakı Ağır Cinayətlər Məhkəməsinin hökmünün Cinayət Məcəlləsinin 150-ci maddəsinə dair hissəsi ləğv edilərək həmin hissədə təqsirləndirilən şəxslərə bəraət verilib, Cinayət Məcəlləsinin 182-ci maddəsi ilə bir məhkumun üzərində 5 il 6 ay, digərlərinin üzərlərində isə 5 il müddətə azadlıqdan məhrum etmə cəzası saxlanılıb.

Baş Prokurorluq hökmdən Ali Məhkəməyə kassasiya protesti verib.