Bakı-Qazax yolunda zəncirvari qəza baş verib, yaralananlar var - YENİLƏNİB

Şəmkir. 21 fevral. REPORT.AZ/ Bakı-Qazax magistral yolunda zəncirvari avtoqəza baş verib.

"Report"un qərb bürosunun məlumatına görə, hadisə magistral yolun 392-ci kilometrliyində, Şəmkir rayonunun Seyfəli kəndinin ərazisindən keçən hissəsində baş verib. 

Belə ki, Şəmkir şəhər sakini, 1963-cü il təvəllüdlü Abbasəli Əhmədovun idarə etdiyi "VAZ-2106" markalı avtomobil idarəetmədən çıxaraq qarşı tərəfdən gələn 1984-cü il təvəllüdlü Gəncə şəhər sakini Qalib Hüseynovun idarə etdiyi "VAZ-21014" markalı avtomobilə çırpılıb. Zərbənin gücündən "VAZ-21014" markalı avtomobil hərəkətdə olan başqa bir "VAZ-2106" markalı avtomobillə toqquşub. 

Hadisə nəticəsində "VAZ-21014"ün sürücüsü və A.Əhmədov yüngül xəsarət alıb, digər avtomobildə isə xəsarət alan olmayıb. 

Qəzaya A.Əhmədovun avtomobilini sərxoş halda idarə etməsinin səbəb olduğu müəyyənləşib.

Faktla bağlı araşdırma aparılır.