Yuxarı

Azərbaycanda qadının ata bağlanılaraq sürüdülməsinin təfərrüatı məlum olub - VİDEO - YENİLƏNİB-3

Azərbaycanda qadını ata bağlayaraq sürüyüblər

Daxili İşlər Nazirliyi (DİN) Mətbuat xidmətinin Gəncə regional qrupu Goranboy rayonunda baş vermiş hadisə ilə bağlı açıqlama verib. 

Qurumdan "Report"un Qərb Mərkəzinə verilən məlumata görə, Əlirzalı kəndində 1984-cü il təvəllüdlü Sahilə Məzahir qızı Ələkbərova qonşuları olan Fürduz Dəmirova və onun övladları (oğlu və qızı) tərəfindən döyülüb.

"Hadisəyə səbəb S.Ələkbərovaya məxsus atın otlayaraq F.Dəmirovanın həyətinə keçməsidir. S.Ələkbərova səhər saatlarında atı onların həyətində görüb və onun oğurlandığını düşünüb. Ona görə də aralarında mübahisə yaranıb. Hər hansı bir ata bağlayaraq sürüdülmə məsələsi olmayıb. Sadəcə, qadını kəndirlə bağlayıb döyüblər. Məsələ ilə bağlı hadisədə iştirak edən şəxslərin izahatı alınıb və araşdırma aparılır", - açıqlamada qeyd olunub.


*** 12:51

Goranboy rayonunda qadının ata bağlanaraq sürüdülməsinin təfərrüatı məlum olub. 

Goranboy Rayon İcra Hakimiyyətinin Əlirzalı kənd icra nümayəndəsi Nizadil Hüseynov "Report"un Qərb Mərkəzinə bildirib ki, Sahilə Ələkbərovanı qonşusu Fürduz Dəmirova oğlu Ariz və qızı Fəridə ilə birlikdə döyüb. 

"Bundan sonra qadının əl-ayağı kəndirlə bağlanıb və sürüdülərək küçəyə çıxarılıb. Ancaq məndə qadının ata bağlanaraq sürüdülməsi haqqında məlumat yoxdur. Sadəcə, qadını özləri sürüyərək yaşadığı evə aparmaq istəyiblər. Bu zaman səs-küyə gələn qonşular qadını onların əllərindən alıblar. Atın oğurlanması və ya ata bağlanaraq sürüdülməsi məsələsi barədə eşitməmişəm, yalan söhbətdir. At, sadəcə, onların həyətinə keçib, bu qadın da oğurlandığından şübhələnib və ona görə də aralarında mübahisə yaranıb", - deyə o qeyd edib.  

Kənd sakinləri isə deyiblər ki, qadın bir həftə öncə itən atını axtarırmış: "Atın qonşunun həyətində olduğunu görüb və daha sonra tərəflər aralarında mübahisə yaranıb. Bu zaman onlar S.Ələkbərovanı döyərək əl-ayağını kəndirləyiblər, daha sonra isə ata bağlayaraq küçədə sürüyüblər. Biz də səs-küyə gəldik, iki qonşu kişi qadının əl-qolunun kəndirini açıblar".

Qeyd edək ki, S.Ələkbərova hazırda Goranboy Rayon Mərkəzi Xəstəxansının Travmatologiya şöbəsindədir. Hadisəni törətməkdə şübhəli bilinən şəxslər isə Goranboy Rayon Polis Şöbəsinə aparılıb.

Faktla bağlı araşdırma aparılır.


*** 12:19

Səhiyyə Nazirliyi Goranboy rayonunda atla sürüdülən 35 yaşlı qadının vəziyyəti ilə bağlı məlumat yayıb. 

"Report"un xəbərinə görə, məlumatda bildirilib ki,  rayonun Xanqərvənd kənd sakini, 35 yaşlı qadın sağ bilək nahiyəsinin və sağ baldırın ön səthinin yumşaq toxumalarının sıyrılmış yaraları diaqnozu ilə Goranboy Mərkəzi rayon Xəstəxanasına gətirilib: "Qadına lazımi tibbi yardım göstərilib, həyatı üçün təhlükə yoxdur. Fatkla əlaqədar hüquq-mühafizə orqanları məlumatlandırılıb".


*** 11:09

Goranboy rayonunda 35 yaşlı qadını ata bağlayaraq sürüyüblər. 

"Report"un Qərb Mərkəzinin məlumatına görə, hadisə rayonun Xanqərvənd kəndində qeydə alınıb. 

Belə ki, rayon sakini, 1984-cü il təvəllüdlü Sahilə Ələkbərova bir neçə gün əvvəl itmiş atlarının qonşusunun həyətində olduğunu görərək onlara gedib. S.Ələkbərova qonşusundan atlarını geri qaytarmağı tələb edib. Bu zaman iki qonşu qadınla aralarında mübahisə yaranıb. Qonşu qadın oğlu və qızı ilə birlikdə S.Ələkbərovanı döydükdən sonra qadını həmin ata bağlayaraq sürüyüblər. 

Ağır bədən xəsarətləri alan qadın ailə üzvləri tərəfindən xəstəxanaya çatdırılıb. Onun vəziyyətinin ağır olduğu bildirilir. 

Hadisə ilə bağlı hüquq-mühafizə orqanlarına məlumat verilib, araşdırmalara başlanılıb. 

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Tərəfdaşların xəbərləri


Xəbər lenti

Son xəbərlər



Orphus sistemi