"Neftçi"nin müdafiəçisi: "Əlimizdən gələni etməliyik"

"Neftçi"nin futbolçusu Mamadu Mbodj Avropa Liqasının I təsnifat mərhələsində "Sperantsa"ya səfərdə 3:0 hesabı ilə qalib gəldikləri ilk matçdan sonra "Report"un Moldovaya ezam olunmuş əməkdaşının suallarını cavablandırıb.

Müdafiəçi əvvəlcə görüş barədə fikirlərini bildirib...

- Çox gözəl oyun oldu. Lazım olan qələbəni qazandıq. Məqsədimiz qalib gəlmək idi. Ancaq bu hələ son deyil. Çünki cavab matçı var. Həmin oyunda da əlimizdən gələni etməliyik ki, yaxşı nəticə qazanaq.

- Müdafiəçi kimi rəqib sizə çətinlik yaratdı, yoxsa işiniz o qədər də çox olmadı?

- Futbolda asan heç nə olmur. Rəqib mübarizə apardı. Cavab oyununa 1 həftə var, yaxşı hazırlamşalı və yenə qalib gəlməliyik.

- Rəqibin cavab matçında sizə çətinlik yaradacığını düşünürsüz?

- Rəqibin necə çıxış edəcəyindən asılı olmayaraq, ciddi hazırlaşmalı və həmin oyunda da bütün gücümüzü ortaya qoymalıyıq.

- Bu gün meydanda olsanız da, komandanızda daha bir yeni güclü müdafiəçi Voislav Stankoviç var. Onunla rəqabətə hazırsınız?

- Komandada yeni yaxşı futbolçuların olması yaxşıdı. Bu, rəqabət yaradır. Stankoviç güclü müdafiəçidi. O da öz oyunu ilə komandaya kömək edə biləcək.

- Ötən mövsüm komanda I mərhələdə məğlub olmuşdu. Bu il daha uğurlu ola biləcəyini düşünürsüz? Ümumiyyətlə, nə qədər irəli getmək sizin üçün uğurlu sayılacaq?

- Keçən il burada deyildim. Ancaq eşitmişdim. Bu da komanda üçün bir təcrübədi. Əlimizdən gələni etməli, var gücümüzü ortaya qoymalıyıq ki, hədəfimizə çataq.