Zaqreb "Dinamo"sunun baş məşqçisi azarkeşlərə görə mətbuat konfransına qatılmayıb

"Dinamo" (Zaqreb) komandasının baş məşqçisi Jelko Kopiç səfərdə "Hayduk"a 0:1 hesabı ilə uduzduqları Xorvatiya çempionatının IX turdan təxirə salınmış oyunundan sonra mətbuat konfransına qatılmayıb.

"Report" xəbər verir ki, bu barədə meydan sahibləri qarşılaşmadan əvvəl məlumatlandırılıb.

O, yalnız yayımçı telekanala açıqlama verdikdən sonra avtobusa minərək, Splitdən paytaxta doğru tələsib. 45 yaşlı mütəxəssis "Polyud" stadionu ətrafına "Hayduk" azarkeşlərinin toplaşacağını əsas gətirərək, arenanın ərazisini təhlükəsiz şəraitdə tərk etmək istədiyini bildirib.

Zaqreb təmsilçisində çıxış edən Azərbaycan millisinin futbolçusu Mahir Emreli matça start heyətdə başlayıb və sonadək meydanda olub.

Qeyd edək ki, 10 komandanın mübarizə apardığı Xorvatiya çempionatı 4 dövrədən ibarətdir. Bu mövsüm Splitdəki ilk derbi öncəsi "Dinamo"nun avtobusu daşa tutulmuşdu. Jelko Kopiç 13 noyabr 2017-ci ildən 19 oktyabr 2018-ci ilədək "Hayduk"un baş məşqçisi olub.