Türkiyədə futbol klubunun prezidenti matçdan sonra hakimi döyüb

“Ankaragücü” futbol klubunun prezidenti Faruk Koca Türkiyə Superliqasında "Rizəspor"la oyundan sonra meydana çıxaraq qarşılaşmanın baş hakim Halil Umut Melerin sifətinə zərbələr endirib.

Bu barədə “Report” Türkiyə mətbuatına istinadən xəbər verir.

Zərbədən sonra baş hakim qazona yıxılıb və daha bir neçə zərbə alıb. H.U.Meler özü ayağa qalxa bilib. Onun sol gözünün altında qançır yaranıb. O, hakimlər otağında müalicə olunub.

Görüş 1:1 hesabı ilə başa çatıb. “Rizəspor” əlavə edilən 7-ci dəqiqədə hesabı bərabərləşdirib. Hazırda “Ankaragücü” 18 xalla 11-ci yerdədir. “Rizəspor” isə 22 xalla 8-ci pillədə qərarlaşıb.