Reşfordun “Vest Hem”ə qolu “qırmızı şeytanlar”a qələbə qazandırıb

İngiltərə Premyer Liqasının 14-cü turunun matçında “Mançester Yunayted” doğma meydanda Londonun “Vest Hem Yunayted”ini qəbul edib.

“Report” xəbər verir ki, komandalar arasında görüş “Old Trafford” stadionunda baş tutub.

Ev sahibləri yeganə qolu görüşün ilk hissəsinin sonlarına doğru, ingiltərəli hücumçu Markus Reşfordun 38-ci dəqiqədə Kristian Eriksenin ötürməsindən sonra dəqiq zərbəsi ilə vura bilib.

Beləliklə, bu qələbədən sonra xallarını 23-ə çatdıran “qırmızı şeytanlar” turnir cədvəlində beşinci pilləyə yüksəlib. “Vest Hem” 14 xalla 13-cü yerdədir.