Premyer Liqa: Lider "Sabah" "İmişli"ni böyük hesabla üstələyib

Misli Premyer Liqasında XXIV turun daha bir oyunu keçirilib.

"Report" xəbər verir ki, günün ilk matçında "Sabah" "İmişli"nin qonağı olub.

Quba Olimpiya İdman Kompleksinin stadionunda keçirilən qarşılaşma Bakı təmsilçisinin qələbəsi ilə yekunlaşıb - 5:0.

"Bayquşlar"ın qollarını Stiv Solvet (10), Coy-Lens Mikels (15-p., 35), Kahim Parris 49), Aleksey İsayev (73-p.) vurub.

Çempionatın lideri olan "Sabah" xallarının sayını 59-a çatdırıb. "İmişli" 22 xalla 9-cu sıradadır.

Günün ikinci matçında "Zirə" "Qarabağ"ı qəbul edəcək.

Qeyd edək ki, tura martın 15-də yekun vurulacaq. Ötən gün "Araz-Naxçıvan" "Karvan-Yevlax"ı (2:1), "Şamaxı" "Sumqayıt"ı (1:0) məğlub edib.