Neymar zədələnməsini şərh edib: "Güclü qıcolma hiss etdim"

Mən qıcolma hiss etdim, amma çox güclü idi.

“Report” xəbər verir ki, bunu Səudiyyə Ərəbistanının "Əl-Hilal" klubunun braziliyalı hücumçusu Neymar AFC Çempionlar Liqasında "İstiqlal"la matçda (3:0) zədələnməsindən bəhs edərkən bildirib.

“Analizlər verəcəyəm və ümid edirəm ki, qorxulu heç nə yoxdur. Bir ildən sonra bu normaldır. Həkimlər artıq məni xəbərdar ediblər. Buna görə diqqətli olmalı və daha çox oynamalıyam", - Neymar deyib.

Qeyd edək ki, hücumçu 57-ci dəqiqədə meydana çıxıb və 86-cı dəqiqədə əllərini budunun arxasından tutaraq meydanı tərk edib.

Neymar üçün "İstiqlal"la oyun uzun fasilədən sonra ikinci olub. Braziliyalı ağır zədə səbəbindən bir ildən çox yaşıl meydanlardan uzaq qalıb.