"Neftçi"nin müdafiəçisi: "İsrailə sərfəli nəticə ilə gedəcəyimizə ümid edirəm"

“Sabahkı oyunun çətin olduğunu bilirik. Meydana qələbə üçün çıxacağıq. Matça çox yaxşı hazırlaşmışıq".

"Report"un məlumatına görə, bu fikirləri “Neftçi”nin müdafiəçisi Mert Çelik İsrailin "Makkabi" (Hayfa) klubuna qarşı keçirəcəkləri Konfrans Liqasının pley-off mərhələsinin ilk oyunundan əvvəl mətbuat konfransında deyib.

21 yaşlı müdafiəçi rəqibin kimliyinin önəmli olmadığını söyləyib: "Sabah öz meydanımızda oynayacağıq. Ümid edirəm ki, səfərə sərfəli nəticə ilə gedəcəyik”.

Mert Çelik hər gün özünü inkişaf etdirməyə çalışdığını vurğulayıb: "Bir hədəfim var, bu yöndə çalışıram. Baş məşqçimiz mənə daha çox şans verir. Mən də bundan yararlanmaq istəyirəm”.

Qeyd edək ki, avqustun 19-da "Bakcell Arena"da keçiriləcək görüş saat 20:00-da başlanacaq.