“Mançester Siti” baş məşqçisi Qvardiola ilə yeni müqavilə imzalayıb 

İngiltərənin “Mançester Siti” futbol klubu ispaniyalı baş məşqçi Xosep Qvardiola ilə yeni müqavilə imzalayıb.

“Report” xəbər verir ki, bu barədə klubun mətbuat xidməti məlumat yayıb.

İspan mütəxəssislə hazırkı müqavilənin müddəti 2025-ci il iyunun sonuna kimi nəzərdə tutulub. Yeni müqavilə daha iki mövsüm üçün bağlanıb.

Qvardiolanın 53 yaşı var və 2016/2017 mövsümünün əvvəlindən “Mançester Siti”yə rəhbərlik edir. Komanda onun rəhbərliyi altında 6 dəfə İngiltərə çempionu olub, 2 dəfə İngiltərə Kubokunu, 4 dəfə Liqa Kubokunu, 3 dəfə İngiltərə Superkubokunu qazanıb.

“Mançester Siti” 2023-cü ildə Çempionlar Liqası, UEFA Superkuboku və Klublararası Dünya Çempionatının qalibi olub.