Tokio-2020: Belaruslu məşqçilər Timanovskaya olayı ilə əlaqədar Olimpiya Kəndindən qovulub

Beynəlxalq Olimpiya Komitəsi belaruslu məşqçilər Yuri Moyiseyeviç və Artur Şumakın akreditasiyasını ləğv edərək, onları Olimpiya Kəndindən kənarlaşdırıb.

"Report"un məlumatına görə, səbəb kimi atlet Kristina Timanovskaya ilə əlaqədar qalmaqal göstərilib.

Bu addım Tokio-2020 Yay Olimpiya Oyunlarında iştirak etmək üçün Yaponiya paytaxtında olan Belarus idmançılarının rifahı naminə müvəqqəti tədbir kimi atılıb. Şumak və Moyiseyeviçə öz mövqelərini bildirmək imkanı gələcəkdə veriləcək.

Timanovskaya ixtisaslaşmadığı estafet qaçışına qoyulmasına etiraz əlaməti kimi yığma rəhbərliyini tənqid edib. Əvəzində Belarus Milli Olimpiya Komitəsi onu iştirak ərizəsindən çıxarıb və özünün razılığı olmadan Tokiodan Minskə deportasiya etməyə çalışıb.

Ölkəsində həbs olunacağından qorxan idmançı hava limanında Yaponiya polisindən kömək istəyib. Beləliklə, Belarusa qayıtmayan atlet sonradan humanitar viza alaraq, Polşanın paytaxtı Varşavaya uçub.