Rusiya cüdoçularının dünya çempionatına buraxılmayacağı təsdiqlənib

Cüdo üzrə Rusiya milli komandasının Özbəkistanın paytaxtı Daşkənddə keçiriləcək dünya çempionatında iştirakına icazə verilməyəcəyi dəqiqləşib.

"Report"un məlumatına görə, bu barədə Rusiya Cüdo Federasiyasının prezidenti Vasili Anisimov TASS-a açıqlama verib.

O, mundiala qatılmayacaqlarını təsdiqləyib: "Beynəlxalq Olimpiya Komitəsinin qərarı təkcə Rusiyanın cüdo komandasına deyil, bütün idmançılarına şamil edilir".

Qeyd edək ki, Daşkənddəki dünya çempionatı 6 - 12 oktyabrda olacaq. Daha əvvəl Ukrayna Cüdo Federasiyası Rusiya idmançılarına icazə veriləcəyi halda dünya çempionatını boykot edəcəyini açıqlayıb.