Mədət Quliyev Şuşadakı ilk beynəlxalq turnirin qalibinə ev bağışlayıb

“Əziz Şuşa” beynəlxalq velosiped yarışına yekun vurulub.

"Report" xəbər verir ki, iyulun 10-da “Əziz Şuşa” beynəlxalq velosiped yarışının ikinci mərhələsi keçirilib. 8 ölkəni təmsil edən 13 komandadan ümumilikdə 75 idmançının qatıldığı yarışın bu mərhələsi Füzuli Hava Limanından start götürməklə Şuşa şəhərindəki “Qarabağ” hotelinin qarşısına qədər davam edib. İdmançılar Azərbaycan Respublikasının Prezidenti cənab İlham Əliyevin tapşırığı ilə inşa edilən “Zəfər Yolu” ilə 71 km məsafədə şose velosipedinin qrup ötüşməsi növündə güclərini sınayıblar. Yarış gərgin və maraqlı idman mübarizəsi şəraitində keçib.

İkinci mərhələnin nəticələrinə görə, Türkiyənin “Sakarya BB Pro Team” klubunun tərkibində yarışan, Azərbaycan milli komandasının üzvü Elçin Əsədov hamıdan sürətli olaraq qızıl, Özbəkistanın “Tashkent City” klubunun üzvü Akramjon Sunnatov gümüş, Monqolustan milli komandasının üzvü İderbold Bold isə bürünc medal qazanıb.

Yarışın lideri olduğuna görə Elçin Əsədova sarı köynək təqdim edilib.

İki günün yekunlarına əsasən komanda proqramında 1-ci yerə Türkiyənin "Sakarya BB Pro Team" klubu, 2-ci yerə Özbəkistanın "Tashkent City" klubu, 3-cü yerə Monqolustan milli komandası çıxıb.

Şuşa qalasının önündə keçirilən mükafatlandırma mərasimində birinci yerə çıxan idmançı və komandaya kubok, medal, qiymətli hədiyyələr, digər qaliblərə isə medal və qiymətli hədiyyələr təqdim olunub.

Mədət Quliyev Azərbaycan Velosiped Federasiyasının adından yarışın qalibi Elçin Əsədova 3 otaqlı mənzil hədiyyə edib.

İdmançılara mükafatları Azərbaycan Respublikasının müdafiə sənayesi naziri, Azərbaycan Velosiped Federasiyasının prezidenti Mədət Quliyev, Azərbaycan Respublikası gənclər və idman naziri Fərid Qayıbov, Azərbaycan Respublikasının Prezidentinin Şuşa rayonunda xüsusi nümayəndəsi Aydın Kərimov, Şuşa Şəhəri Dövlət Qoruğu İdarəsinin İdarə Heyətinin sədri Məftun Abbasov, gənclər və idman nazirinin müavini Mariana Vasileva, AVF-nin vitse-prezidenti Robert Eyyubov təqdim ediblər.

Bununla da “Əziz Şuşa” beynəlxalq velosiped yarışına yekun vurulub.

Xatırladaq ki, yarışın birinci mərhələsi Bakının Pirallahı rayonunda Nərəkənd parkının yaxınlığında fərdi ötüşmə növü üzrə keçirilib. Bu mərhələdə velosipedçilər 21 km məsafə qət ediblər.

Qeyd edək ki, yarış Azərbaycan Respublikası Gənclər və İdman Nazirliyi, Azərbaycan Velosiped Federasiyası və Şuşa Şəhəri Dövlət Qoruğu İdarəsinin təşkilatçılığı ilə Nazirlər Kabinetinin təsdiqlədiyi tədbirlər planına əsasən, "Şuşa ili"nə həsr olunmuş tədbirlər çərçivəsində keçirilib.