Bakıda parapauerliftinq üzrə dünya çempionatı keçiriləcək

Azərbaycan Milli Paralimpiya Komitəsinin (AMPK) təşkilatçılığı ilə Bakıda bu il görmə məhdudiyyətli şəxslər arasında "2022 IBSA World Powerlifting and Bench Press Championship" yarışı keçiriləcək.

AMPK-dan "Report"a verilən məlumata görə, 1 - 10 oktyabrda təşkil olunacaq dünya çempionatında 25-dən artıq ölkənin iştirakı gözlənilir. Yarış öncəsi beynəlxalq həkimlərin iştirakı ilə idmançılar üçün tibbi təsnifatın və eyni zamanda hakimlər üçün seminarların da keçirilməsi nəzərdə tutulur.

Qeyd edək ki, Azərbaycanda 2022-ci ildə görmə məhdudiyyətli idmançıların iştirakı ilə 2 beynəlxalq yarış keçiriləcək. 7 - 9 noyabrda Bakıda paracüdo idman növü üzrə də dünya çempionatı baş tutacaq.