Energetika naziri Pərviz Şahbazov Azərbaycanda səfərdə olan türkiyəli həmkarı Alparslan Bayraktarla görüşüb.
“Report”
Azərbaycan və Türkiyə arasında enerji sahəsində əməkdaşlığın bütün dünyada təqdir olunduğunu deyən Bayraktar əməkdaşlığın təkcə iki ölkənin iqtisadiyyatına deyil, həm də regiona, xüsusilə də Avropanın enerji təhlükəsizliyinə və neft bazarlarının daha balanslı olmasına töhfə verdiyini vurğulayıb.
Bayraktar Türkiyə və Azərbaycanın prezidentləri Rəcəb Tayyib Ərdoğan və İlham Əliyevin rəhbərliyi ilə enerji sahəsində çox böyük layihələr həyata keçirdiyini xatırladaraq həm regional, həm də qlobala önəmə sahib Bakı-Tbilisi-Ceyhan, Bakı-Tbilisi-Qars və TANAP kimi layihələrin uyuşuq şəkildə həyata keçirildiyini qeyd edib.
Yeni layihələr üzərində də çalışdıqlarını bildirən Bayraktar “İğdır-Naxçıvan qaz boru kəmərində işlər intensiv şəkildə davam etdiyini” söyləyib.
“Bu xətti vaxtından əvvəl hazır edəcəyik. Naxçıvanın qazı bu ilin qış aylarında Türkiyə üzərindən gələcək”.
Türkiyə hökumətinin üzvü elektrik enerjisi sahəsində çox mühüm irəliləyişlərin olduğunu deyib:
“Azərbaycan çox güclü bərpa oluna bilən mənbələrə malik ölkədir. Xəzər dənizindəki külək tutumu və Naxçıvandakı günəş enerjisi tutumu təkcə Türkiyədəki şirkətləri deyil, bir çox beynəlxalq şirkəti də cəlb edir. Sadəcə resursların olması yetərli deyil. Eyni zamanda bazarın və tələbin də olması lazımdır. O anlamda Türkiyə ilə Azərbaycanın bir-birini tamamlayıcı rolu var”.
Bayraktar qeyd edib ki, dünyada olduğu kimi, Türkiyədə də elektrik enerjisinə tələbat artıb:
“Biz elektrik enerjisini daha təmiz üsullarla istehsal etməyi hədəfləyirik. Həm Türkiyədəki bərpa olunan enerji potensialını reallaşdıracağıq, həm də ətrafımızdakı elektrik enerjisini Türkiyəyə və Türkiyədən Avropaya aparmaqla bağlı birgə layihələr hazırlayırıq. İki ölkə olaraq bizim bundan sonra çoxlu layihələrimiz var. Biz addım-addım və sistemli şəkildə irəliləyirik”.
![](https://static.report.az/photo/4b5ef79d-7925-3196-9dec-54651361fc14_300.jpg)
![](https://static.report.az/photo/bfb65890-600a-35ed-804c-94bf692b6ae0_300.jpg)
![](https://static.report.az/photo/1537a24d-83bf-36d5-bf77-ee3c7fcfd25c_300.jpg)
![](https://static.report.az/photo/1901354a-4c0d-3a80-a25a-bbd359bfa95f_300.jpg)
![](https://static.report.az/photo/edb57021-3b5d-3f63-bad2-e2e1d681e45d_300.jpg)
![](https://static.report.az/photo/7cc2536f-0746-3d9b-b702-37e028bb8648_300.jpg)