BTC kəməri ilə nəql edilən tranzit neftinin həcmi 15 %-dən çox azalıb

Bu ilin yanvar-oktyabr aylarında Azərbaycanın magistral neft kəmərləri ilə 29 milyon 90 min ton neft nəql edilib.

“Report”un Dövlət Statistika Komitəsinə istinadən verdiyi xəbərə görə, bu, ötən ilin eyni dövrü ilə müqayisədə 0,7 % azdır.

Bu ilin 10 ayı ərzində nəqletmənin 74,9 %-i Bakı-Tbilisi-Ceyhan (BTC) neft ixrac kəməri ilə həyata keçirilib.

Hesabat dövründə BTC vasitəsilə 21 milyon 777 min ton neft ötürülüb. Bu isə ötən ilin müvafiq ayları ilə müqayisədə 6,3 % azdır.

Bu dövr ərzində BTC kəməri ilə 2 milyon 815 min ton tranzit nefti də nəql edilib ki, bu da 2020-ci ilin yanvar-oktyabr ayları ilə müqayisədə 15,3 % azdır.

Xatırladaq ki, Heydər Əliyev adına Bakı-Tbilisi-Ceyhan Əsas İxrac Boru Kəməri (BTC) "Əsrin müqaviləsi" çərçivəsində Xəzər dənizinin Azərbaycan sektorunda hasil olunacaq xam neftin dünya bazarına çıxışını təmin etmək üçün inşa edilmiş boru nəqliyyat vasitəsidir. Kəmərin uzunluğu 1 767 kilometrdir. Onun 443 km-i Azərbaycanın, 248 km-i Gürcüstanın, 1 076 km-i isə Türkiyənin ərazisindən keçir. Kəmərin istismar müddətinin 40 il, orta ötürücülük qabiliyyətinin gündə 1 milyon barel olması nəzərdə tutulub.

Azərbaycan Dövlət Neft Şirkəti BTC layihəsində iştirak etmək məqsədi ilə "AzBTC Co." törəmə şirkətini yaratmışdır. Bu şirkət layihənin iştirakçıları olan neft şirkətlərinin konsorsiumu tərəfindən yaradılmış "BTC Company" şirkətində 25 %-lik paya malikdir. "AzBTC Co." şirkəti daxil olmaqla, layihənin bütün iştirakçıları layihənin dəyərinin 30 %-lik hissəsini öz vəsaitləri hesabına, qalan 70 %-lik hissəsini isə beynəlxalq maliyyə institutlarından, ixrac kredit agentliklərindən və kommersiya banklarından cəlb edilmiş kredit vəsaitləri hesabına maliyyələşdirirlər. Azərbaycan dövləti adından Azərbaycan "BTC Co." şirkətindəki 80 %-lik payın təmsilçisi kimi İqtisadiyyat Nazirliyi çıxış edir.