Azərbaycan və İtaliya energetika sahəsində əlaqələri daha da genişləndirəcək

Azərbaycan və İtaliya energetika sahəsində əlaqələri daha da genişləndirəcək Energetika naziri Pərviz Şahbazov İtaliyanın Azərbaycana yeni təyin edilmiş fövqəladə və səlahiyyətli səfiri Klaudio Taffurini qəbul edib
Energetika
156
30 İyun , 2021 11:07
Azərbaycan və İtaliya energetika sahəsində əlaqələri daha da genişləndirəcək

Energetika naziri Pərviz Şahbazov İtaliyanın Azərbaycana yeni təyin edilmiş fövqəladə və səlahiyyətli səfiri Klaudio Taffurini qəbul edib.

“Report”un Energetika Nazirliyinə istinadən verdiyi məlumata görə, nazir Klaudio Taffurini Azərbaycana səfir təyin olunması münasibətilə təbrik edib, Azərbaycandakı diplomatik fəaliyyətində uğurlar arzulayıb. Yüksək səviyyəli qarşılıqlı səfərlərə diqqət çəkilib, Azərbaycan Prezidenti İlham Əliyevin İtaliyaya dövlət səfərinin iki ölkə arasında əlaqələrin gələcək inkişafı baxımından tarixi səfər olduğu və münasibətlərin dərinləşməsinə xüsusi təkan verdiyi bildirilib. Ölkələrimiz arasında müxtəlif sahələrdə mövcud olan əməkdaşlıq münasibətləri vurğulanıb, bu münasibətlərin gələcəkdə daha da inkişaf etdiriləcəyinə əminlik ifadə edilib.

Uzunmüddətli əməkdaşlıq əlaqələrində enerji sektorunda tərəfdaşlığın mühüm rol oynadığı qeyd edilib. Azərbaycan ilə İtaliya arasında iqtisadi əməkdaşlıq üzrə Hökumətlərarası Komissiyanın 5-ci iclasının protokolunun icrasına diqqət çəkilib, gündəlikdə bir çox məsələlərin olduğu, qlobal pandemiyanın təsirlərinə baxmayaraq məsələlərin həlli istiqamətində əhəmiyyətli işlərin görüldüyü qeyd edilib.

Səfir öz növbəsində səmimi qəbula və təbrikə görə təşəkkür edib. Ölkələrimiz arasında dostluq və əməkdaşlıq münasibətlərinin dinamik inkişafının yüksək qiymətləndirildiyini, energetika sahəsində əlaqələrin daha da genişləndirilməsinə səy göstərəcəyini bildirib.

Görüşdə müvafiq sahədə ikitərəfli münasibətlərin mövcud səviyyəsi və inkişaf perspektivləri müzakirə edilib, qarşılıqlı maraq doğuran bir sıra məsələlər ətrafında fikir mübadiləsi aparılıb.

Son xəbərlər

Orphus sistemi