TKTA: Xarici dövlətlərin ali təhsilə aid kvalifikasiyalarının tanınması ilə bağlı bəzi şəhadətnamələr saxtalaşdırılır

Son zamanlar vətəndaşlar, işəgötürənlər, tərəfdaş qurumlar tərəfindən Təhsildə Keyfiyyətin Təminatı Agentliyinə (TKTA) edilən müraciətlərə əsasən aparılan araşdırma nəticəsində məlum olub ki, xarici dövlətlərin ali təhsilə aid kvalifikasiyalarının tanınması ilə bağlı bəzi şəhadətnamələr saxtalaşdırılır.

"Report" xəbər verir ki, bu barədə TKTA məlumat yayıb.

Qeyd edilib ki, xarici dövlətlərin ali təhsilə aid kvalifikasiyalarının tanınması “Xarici dövlətlərin ali təhsilə aid kvalifikasiyalarının tanınması Qaydaları" həyata keçirilir.

Sözügedən Qaydalara əsasən xarici dövlətlərin ali təhsilə aid kvalifikasiyalarının Azərbaycan ərazisində qüvvədə olması üçün tanınmanın həyata keçirilməsi zəruridir. Müraciətçinin sənədlərinin ekspertizasının nəticəsi müsbət qərarla yekunlaşdığı təqdirdə, tanınma şəhadətnaməsi müvafiq olaraq elektron şəkildə müraciətçinın şəxsi kabinetinə göndərilir.

"Təəssüflə qeyd etmək istərdik ki, saxta şəhadətnamə sahibləri dinlənildikdə, diplom tanınması üçün müəyyən vasitəçilərlə əməkdaşlıq etdikləri məlum olmuşdur. Bir daha diqqətinizə çatdırırıq ki, TKTA xaricdə təhsil sahəsində, o cümlədən tanınma prosedurları ilə bağlı heç bir şəxslə, şirkətlə əməkdaşlıq etmir və bu kimi vasitəçilərin fəaliyyətlərinə görə heç bir məsuliyyət daşımır. Qeyd edirik ki, sözügedən əməl Azərbaycan Respublikasının qanunvericiliyinə əsasən cinayət məsuliyyəti yaradır və TKTA öz növbəsində aşkarlanmış faktlar üzrə mütəmadi olaraq aidiyyəti qurumları məlumatlandırır", - deyə məlumatda qeyd edilib.