OSIRIS-REx zondunun kapsulu asteroiddən alınan maddə nümunəsi ilə Yerə qayıdıb

OSIRIS-REx zondunun kapsulu missiyanın başlamasından yeddi il sonra Bennu asteroidindən alınan maddə nümunələri ilə Yerə qayıdıb.

“Report” xəbər verir ki, bu barədə NASA məlumat yayıb.

Eniş ABŞ-nin şərq sahili vaxtı ilə saat 10:52-də (Bakı vaxtı ilə 19:52) Yuta ştatındakı poliqonda gerçəkləşib. Səyahət zamanı zond təxminən 6,1 milyard km məsafə qət edib.

OSIRIS-REx zondu 2016-cı ilin sentyabrında yaxın keçmişdə planet üçün əsas kosmik təhlükələrdən biri hesab edilən Bennu asteroidinin (1999 RQ36) səthindən nümunələr toplama missiyasının bir hissəsi kimi uğurla orbitə buraxılıb. O, 2018-ci ilin dekabr ayının əvvəlində göy cisminə çatıb.

2020-ci ilin oktyabr ayında zond Bennu asteroidinin səthinə “Naytingeyl” adlı nöqtədə uğurla enib. NASA aparatı maddə nümunələrini toplayıb və göyərtədə olan spektroskoplar, kameralar, həmçinin digər elmi alətlərdən istifadə edərək mümkün qədər yaxından Bennunun strukturunu və xassələrini ətraflı araşdırıb. 2021-ci ilin yazında OSIRIS-REx Bennunun orbitindən çıxıb və Yerə qayıtmağa başlayıb.