Naxçıvanda peşə təhsili alanların sayı 14 faiz artıb

Naxçıvan Muxtar Respublikasında (MR) peşə təhsili alanların sayı 14 faiz artıb.

"Report"un yerli bürosu xəbər verir ki, bu barədə məlumat Muxtar Respublikanın Təhsil Nazirliyində 2025-ci ildə görülmüş işlərin nəticələri, 2026-ci ildə qarşıda duran vəzifələrlə bağlı keçirilən kollegiya iclasında açıqlanıb.

Bildirilib ki, peşə təhsili pilləsi üzrə fəaliyyət göstərən 3 təhsil müəssisəsində hazırda 43 qrup üzrə tədris təşkil olunur. Müəssisələrdə 75 nəfər təhsil verən çalışır, ümumilikdə isə 685 tələbə təhsil alır.

Qəbul planına əsasən, 2024–2025 və 2025–2026-cı tədris illərinin hər birində 27 adda ixtisas üzrə 35 qrupda 700 plan yeri ayrılıb.

Statistik göstəricilərə görə, 2024–2025-ci tədris ilində peşə təhsili müəssisələrinə qəbul olan tələbələrin sayı 462 nəfər (66 faiz) olduğu halda, 2025–2026-cı tədris ili üzrə bu göstərici 562-yə (80 faiz) yüksəlib.