Dini Komitənin sədri Qubadakı məscidləri ziyarət edib

Dini Qurumlarla İş üzrə Dövlət Komitəsinin sədri Ramin Məmmədov Quba şəhərində yerləşən Hacı Cəfər, Cümə, “Ağ məscid”, Ərdəbil və Səkinəxanım məscidlərini ziyarət edib.

Bu barədə “Report”a Dini Komitədən məlumat verilib.

Bildirilib ki, Ramin Məmmədov ibadət yerlərində fəaliyyət göstərən din xadimləri ilə görüş zamanı Azərbaycan xalqının əsrlər boyu yaşatdığı dəyərlərin, ənənələrin qorunmasının əhəmiyyəti, eləcə də bu istiqamətdə görülən işlər barədə danışıb.

O, milli-mənəvi dəyərlərin gələcək nəslə aşılanmasının önəminə də toxunaraq vurğulayıb ki, gənclərin vətənpərvərlik hisslərinin inkişaf etməsində, milli kimliklərinin formalaşmasında bu dəyərlər özünəməxsus rola malikdir. Din xadimləri bu baxımdan xüsusi fəallıq nümayiş etdirməli, milli mentalitetimizə yad olan ideologiyaların yayılmasına qarşı mübarizədə ön sıralarda yer almalıdırlar.

Daha sonra din xadimləri ibadət yerlərinin tarixi barədə məlumat verib, dövlətin onlara göstərdiyi diqqət və qayğıya görə minnətdarlıqlarını bildiriblər.