Tayvanda qasırğa nəticəsində onlarla insan xəsarət alıb, minlərlə insan işıqsız qalıb

"Danas" qasırğası Tayvanın cənub-qərbində 28 nəfərin xəsarət almasına səbəb olub.

"Report"un xarici mətbuata istinadən məlumatına görə, 2 853 nəfər təhlükəsiz ərazilərə təxliyə edilib.

Tayvan Mərkəzi Meteorologiya İdarəsinin məlumatına görə, adada güclü leysan və sürəti 40-50 m/s aralığında dəyişən külək tüğyan edir.

Təbii fəlakət nəticəsində 85 113 ev təsərrüfatının elektrik təchizatında fasilələr yaranıb. Hazırda elektrik təchizatı qismən bərpa edilib.

Bəzi sahilyanı ərazilərdə bütün obyektlər və məktəblər bağlanıb.

Sinoptiklərin məlumatına görə, qasırğa hazırda adanın qərb sahili boyunca şimala doğru hərəkət edir.