Rusiyanın xeyrinə casusluqda təqsirləndirilən italiyalı 30 il müddətinə azadlıqdan məhrum edilib

Roma hərbi tribunalı Rusiyanın xeyrinə casusluq etməkdə təqsirləndirilən italiyalı hərbçi Valter Biota hökm oxuyub və onu 30 il müddətinə azadlıqdan məhrum edib.

“Report” ANSA agentliyinə istinadən xəbər verir ki, Biot Müdafiə Nazirliyinin Baş Qərargahının əməkdaşı olub.

O, 2021-ci il martın 30-da Rusiya səfirliyinin attaşeliyinin nümayəndəsi ilə birlikdə saxlanılıb.

Axtarış zamanı onlardan məlumat daşıyıcısı və bir qutu nağd pul tapılıb. Biot casusluq məqsədilə məxfi məlumatları yaymaqda, məxfi məlumatları ötürməkdə və casusluq məqsədilə şəkillər çəkməkdə ittiham olunurdu.

Biotun dörd övladı var, onlardan biri fiziki məhdudiyyətlidir.

Eyni zamanda, mülki məhkəmədə də hərbçiyə qarşı proses gedir. Məhkəmə yayadək ertələnib. Hərbi tribunalın qərarı hələ yuxarı instansiyalarda mübahisələndirilə bilər.