Peruda transgenderlər psixi pozğunluğu olan insanlar kimi təsnif ediləcək

Peru hökuməti transseksualizmi psixi pozğunluq siyahısına salan fərman verib.

“Report” xəbər verir ki, sənədin mətni hökumətin “El Peruano” qəzetində dərc olunub.

Fərman psixi sağlamlıq problemlərinə görə pulsuz psixoloji yardım almaq hüququ olan vətəndaşların kateqoriyalarını genişləndirir. Belə ki, siyahıya transseksualizmlə yanaşı, transvestizm və digər cinsi kimlik pozğunluqları da daxildir.

Peru Səhiyyə Nazirliyi bildirib ki, ölkədə transseksualizm və gender disforiyasının yetkinlik dövründə şəxsiyyət və davranış pozuntuları kimi təsnif edildiyi Xəstəliklərin Beynəlxalq Təsnifatının 10-cu versiyası fəaliyyət göstərməkdə davam edir.

Bununla yanaşı, nazirlik “cins və cinsi müxtəliflik” hallarını xəstəlik hesab etmədiyini vurğulayıb.