Komitə Blinkeni Konqresə hörmətsizlikdə ittiham edən qətnaməni təsdiqləyib

ABŞ Konqresinin Nümayəndələr Palatasının Xarici Əlaqələr Komitəsi ABŞ dövlət katibi Entoni Blinkeni Amerika qanunverici orqanına hörmətsizlikdə ittiham edən qətnaməni dəstəkləyib.

“Report” xəbər verir ki, qətnamədə Amerika diplomatiyasının rəhbəri ABŞ qoşunlarının 2021-ci ildə Əfqanıstandan çıxarılması ilə bağlı dinləmələrdə iştirak etməkdən imtina etdiyinə görə Konqresə hörmətsizlikdə ittiham olunur.

Mətdə deyilir ki, Blinkenin aylarla bildiriş və təkliflərə baxmayaraq, komitənin çağırış vərəqəsinə cavab verməkdən imtina etməsi hörmətsizlik kimi qiymətləndirilməlidir.

Komitə tərəfindən təsdiq edildikdən sonra təşəbbüs Nümayəndələr Palatasının tam iclasında nəzərdən keçiriləcək.

Komitənin sədri Maykl Makkol dəfələrlə Blinkeni Əfqanıstanla bağlı dinləmələrdə çıxış etməyə çağırıb. Qanunverici Amerika qoşunlarının Əfqanıstandan çıxarılması prosesində xarici siyasət idarəsinin və şəxsən dövlət katibinin əsas rol oynadığını vurğulayıb.

O, dinləməni sentyabrın 24-nə təyin etmişdi, lakin Blinken Nyu-Yorkda BMT Baş Assambleyasının 79-cu sessiyasında iştirak etdiyi üçün Konqres qarşısında ifadə verə bilməyib.